كل ما بيزيد حجم المنظمة ، كل ما بيزيد تعقيد وتفاصيل الخطة ، والأطراف المسئولين عنها ، وكمان بيزيد حجم الأفكار ، وعشان كده شركات كتير بتبدأ تلجأ للشركات المتخصصة فى الاستشارات التسويقية والإدارية عشان تكتبلها الخطة ، وأحياناً كمان بيوصل الموضوع مع المنظمات دى إنها تسيب المهمة التسويقية بالكامل للشركات المتخصصة فى كده.
أهمية الخطة التسويق فى إنها بتدّى الشركة بُعد نظر ، ورؤية مستقبلية ، وتخليها دايماً باصّة على المستقبل ، وفى حال شغل وإنجاز دائم ، عشان تقدر تحقق الأهداف اللى ليها وقت وزمن معين ، وبالتالى بنلاقى الشركات اللى فاهمة يعنى إيه خطة تسويق بتسابق نفسها والوقت عشان تحقق الأهداف اللى حطّطها فى الأول ، وفرضتها على نفسها ، ولو الشركة عاملة نظام رقابة صح ، ساعتها هيبقى معنى إن الخطة انحرفت عن المسار ، والنصيب السوقى اللى كان مفروض يتحقق ومتحققش ، أو الربحية اللى كانت المنظمة عاوزاها و محصلتش ، ساعتها ، يبقى فى ناس هتتجازى وتتحاسب ، وناس هتفقد وظيفتها ، ومكانها فى الشركة ، ده فى حالة ثبوت كسل ، و خطأ الناس اللى نفذت الخطة ، وأحياناً بتكتشف الشركة خطأ الخطة من الأول وعدم جودتها ، ويبقى الغلط كان من اللى حطّوا الخطة من الأساس ، وساعات بيطلع كل دول براءة لمّا يحصل ظروف مفاجأة وغير متوقعة ، وفعلاً لازم تكون غير متوقعة على الإطلاق ، لإن من واجب أى مدير إنه يتخيل سيناريوهات كتير بديلة ممكن تحصل ، ويكون محضّر معاها القرار مسبقاً.
بنظرة عملية على السوق المصرى ، هنلاقى إن موضوع الخطة التسويقية ده جديد على شركات كتير ، ودى الشركات اللى لسه معرفتش يعنى إيه تسويق ، ولا أهميته ودوره فى بناء وتماسك وإنجازات المنظمة ، وكمان فى الشركات والمنظمات اللى قايمة على نشاط مكمّل مش أساسى ، يعنى مثلاً نفترض شركة فى مصر واخدة توكيل من شركة ألمانية ، عشان توزع منتجات الشركة فى مصر ، ساعتها بيبقى كل تركيزها على التوزيع بس ، لأن بالنسبة ليها التسويق ده مسئولية الشركة الألمانية ، مش الوكيل أو الموزع.
فى شركات كبيرة فى مصر ، تعرف يعنى إيه تسويق وخطة تسويقية ، وبتاخد وقت كبير فى البحوث التسويقية ، وكشف السوق ، قبل تطوير الخطة ، وبيبقى المسئول عن الخطة وتنفيذها مدير التسويق (Marketing Manager) فى البناء التقليدى المعروف ، وإن كان البناء الجديد ، مدير التسويق بيتقسم فيه على حسب البراند (Brand Manager) ، وبيمسك مسئولية أكبر بعد كده ، لمّا بيبقى مسئول عن الخطة التسويقية لمنتج كامل (Product Manager).
فى خطأ شائع بين الناس عموماً ، والشركات اللى بتعمل خطط تسويق ، إن الخطة التسويقية دى مجموعة خطوات مستحيل نحيد عنها ، وإن لازم تبقى معمولة بالحرف زى الكتب ومراجع التسويق ما بيقولوا ، وده غلط ، وسر من أسرار فشل الخطط التسويقية ، لإن وعلى الرغم من إن الخطة التسويقية فيها فعلاً نقط لازم تشتمل عليها أى خطة ، لكن الخطة التسويقية الناجحة عبارة عن خطوات مرنة جداً ، قابلة للزيادة أو النقصان ، ومرحبة جداً بأى تغيرات أو تعديلات ، وكل ما تزيد مرونة الخطة ، مع حفاظها على الالتزام وتحقيق الأهداف ، كل ما تزيد قوتها ، والمتعة عند تحقيقها ، لإن ببساطة اللى بيحققوها بيكونوا فى جو من المرونة والإبداع ، وبعيد عن الضغوط العصبية اللى بيقعوا تحتيها ، وبيقدر رجال المبيعات يشتغلوا بإبداع وقدر من الحرية ، اللى مربوطة بتحقيق الأهداف التسويقية.
كمان لازم يعرف اللى بيعمل الخطة التسويقية ، إن حجم ودرجة التفاصيل فى الخطة بيعتمد على حجم المنظمة ، فمستحيل نلاقى شركة زى (مايكروسوفت- Microsoft) ، أو (يونيليفر -Unilever ) يعملوا خطة تسويق ، زى ما هتعملها شركة لسه ناشئة وبتقول ياهادى فى السوق.
مهم لرجال التسويق فى المنظمة إنهم ميعملوش الخطة التسويقية ، وينسوا إن فى بشر تانين فى الشركة ، عايشين فى الإدارات المالية وإدارات الموارد البشرية ، والإنتاج والإمدادات وباقى الإدارات التانية ، وعشان كده اللى بيكتب خطة تسويق ، لازم يتفق وينسق مع باقى الإدارات ، وده سر من أسرار نجاح المنظمة عموماً ، ونجاح إدارة التسويق خصوصاً ، وعشان كده ممكن نفترض شركة عملت حملة دعائية كبيرة جداً ، وحققت من خلالها زيادة فى حجم الناس اللى عاوزين المنتج ، و فى اللحظة اللى بدأت فيها الجماهير تطلب المنتج فى المحلات ومنافذ البيع ، اتفاجأ مديرين التسويق ، بإن إدارة الإنتاج مش قادرة تنتج الإنتاج اللى يوفى الطلب والضغط الهايل من المشترين ، ساعتها هتقع الشركة فى أزمة كبيرة.
أو يحصل الموقف الشهير ، إن رجال التسويق يعملوا حملة دعائية ضخمة جداً يضغطوا بيها على ميزانية الشركة ، وده كان نتيجة إن مكنش فيه اتفاق وتنسيق بين إدارة التسويق ، والإدارة المالية.
هنبدأ سلسلة نتعرف ونتمكن فيها من الخطة التسويقية ، لدرجة الإحتراف فى كتابتها وتنفيذها إن شاء لله ، وهنعتمد فى كده على خطة لشركة ناشئة هى (Sonic) ضربها (فيليب كوتلر- Philip Kotler) كمثال فى كتابه (أساسيات التسويق- Principles of Marketing) ، واختيارى للخطة دى بسبب إنها بسيطة ، ومكتوبة بشكل واضح ، كمان إنها منشورة بشكل رسمى ، ومش بتتعرض لخطط تسويقية بتتنفذ حالياً فى السوق المصري.
كمان من مزايا الخطة دى إنها تعتبر خطة عمل كاملة (Business plan) ، وده هيساعد أى شخص حابب يبدأ عمل حر ، أو ينفذ مشروع إنه يعرف إزاى يكتب خطة عمل ، ويشمل فيها خطة التسويق.
هناك تعليق واحد:
ttes
إرسال تعليق